阿積士+1嗒糖

猪拉多纳

07/12/2011
文： 法比加輝

歐聯D組最後一輪賽事，阿積士主場鬥皇家馬德里。「銀河艦隊」已鎖定首名出線，對佢哋嚟講今回只屬例行公事，教練莫連奴因而讓數名主力留在西班牙休息，抖足精神惡鬥巴塞。阿積士攞多一分夠出線，今場唔會鬆懈，主場受讓值博。


（有線63及203台周四凌晨3時45分直播）。


D組形勢已非常明朗，皇馬肯定首名，而排第二嘅阿積士亦都踏咗大半隻腳入十六強，事關佢哋領先里昂三分，因兩軍對賽成績一樣，但阿積士在得失球差上領先里昂七球，所以後者要大勝之餘，同時寄望阿積士大敗先有機會創造奇迹。當然，阿積士又點會畀里昂呢個奇迹發生，故今仗主場力保不敗已足夠。

里昂焗攻大起戴拿模

事實上要在皇馬身上取分唔難，全因「艦隊」已穩奪首名，最關鍵係皇馬緊接今場賽事後要應付西班牙國家打吡，畀着你係教練都唔會咁戇居，喺場無關痛癢嘅波度浪費氣力啦，所以皇馬好可能只求「平穩過渡」，冇傷冇病返西班牙就已完成任務。卡斯拿斯、狄亞拉、沙治奧拉莫斯及C朗拿度都獲准留在馬德里，陣容不整難讓波。


同組另一場薩格勒布戴拿模主場對里昂，客隊冇得諗要求大勝，而主隊就求零的突破，兩軍都冇包袱鬥攻，大盤屬不二之選。