阿仙奴訪奧林比 攻「細」難求

猪拉多纳

06/12/2011
文： 走肖

奧林比亞高斯今晚喺歐聯F組主場對阿仙奴，上演最後一輪分組賽，主隊形勢上需要搶分爭出線，弊在最有創造力嘅中場艾巴卡沙都傷埋，根本唔似谷得起，撞啱兵工廠篤定首名出線收起多名主將，呢場兩隊都唔似多波入，玩1.72倍入球細啱數。（有線64及204周三凌晨3:45直播）




首循環奧林比亞高斯只係以1:2不敵阿仙奴，理應唔會任人魚肉。雖然形勢上奧林比亞高斯至少有分落袋至出到線，可惜首循環入波嘅中場富斯達傷咗，効力過馬體會嘅艾巴卡沙未好番，即使想攻都恐怕有心無力，咁嘅情況自然開細易過開大。


奧林比亞高斯進攻中場打柴


對家阿仙奴喺英聯賽出局，聯賽又落後榜首嘅曼城12分，既然歐聯分組賽肯定首名出線，當然要收埋啲攻擊主力留力，隊長尹佩斯、前鋒謝雲奴、翼鋒禾確特同中場路斯基預料全部缺陣，取而代之係雪到硬晒嘅查馬克，配合艾沙維、阿歷士張伯倫同高基連打正選。




淨係睇排陣，都已經好難令人覺得呢場開到入球騷，更重要係，兵工廠領隊雲格留起進攻武器嘅同時，講明會排出相對完整嘅後防陣容，避免輸得肉酸，除咗史基拿斯今季比較少上陣，哥斯尼、華美倫同安德里山度士都經常喺正選陣容出現，對住奧林比亞高斯應頂得住，入球細博得過。