車仔殲滅蝙蝠

猪拉多纳

06/12/2011
文： 樂比堅尼

歐聯E組分組賽生死戰，車路士主場迎戰華倫西亞。車路士早前連番失利陷入低潮，承受極大壓力嘅領隊保亞斯上周終忍唔住出招，除決定明年一月大換血，更將滋事分子安歷卡及阿歷士洛里高「軟禁」，呢招果然奏效，車仔上仗立即反彈贏紐卡素三比○，今晚對「蝙蝠兵團」華倫有望延續強勢，樂比仔捧主勝。（有線61及201台周三凌晨3時45分直播）




車路士積弱非一朝一夕問題，早喺上季開始，球隊已出現老化問題，但初來甫到嘅保亞斯決定以不變應萬變，經過幾個月試驗後，保帥終於承認失敗，據英國傳媒報道，明年一月杜奧巴、保辛華、保羅費拉拿、沙洛文卡勞、安歷卡及阿歷士洛里高等人都會被賣走。


和波兇險勢搏盡爭勝


其中搞事嘅安歷卡及阿歷士洛里高上周被貶落預備組，更禁止使用所有一隊設施，連停車場都唔畀泊，去到咁盡，保亞斯無非係想畀一個訊息各位球員，就係車路士依家已去到危急存亡之秋，邊個玩嘢就冇得留低，從車仔上場聯賽踢出代表作，大勝紐卡素三比○所見，樂比仔得出一個結論，就係車仔班球員唔見棺材唔流眼淚！




講番E組形勢，榜首利華古遜得九分提早出線，車路士與華倫同得八分，今場車仔贏波出線，輸波出局，和波都好麻煩，如果打成一比一以上，車仔都要出局，如果係○比○，在對賽成績優於華倫情況下，只要利華在另一場作客亨克保持不敗，車仔就可以出線，但如果利華唔生性輸波，在三隊同分互計對賽成績下，華倫就可以壓倒車仔出線。


華倫作客走晒樣


雖然有啲危，但車路士歐聯主場出戰向來有一定保證，之前兩場分組賽分別大勝亨克五比○及贏利華二比○。反觀另一邊廂嘅華倫西亞，作客一向非佢哋強項，已連續五場歐聯作客贏唔到，睇怕今場只能淪為車仔炮灰！