漢堡「紐」轉乾坤

猪拉多纳

04/12/2011
文： 郭球奇

自從芬克揸旗後，漢堡班波可謂愈踢愈好，日前喺熱身賽派二線隊都照贏對手，證明班副選都一樣咁弗，今晚喺德甲主場對住作客蟲紐倫堡，仲有對賽優勢，呢場「雙堡下游大戰」，球奇撐硬1.75倍主W！（有線61、64及204周日晚10:30直播）


漢堡 Vs 紐倫堡


季初出閘脫腳嘅漢堡，自從早前請得前拜仁名將芬克執教後，即時脫胎換骨，上輪德甲作客漢諾威踢得鬼死咁好，漢諾威最後幾經辛苦先憑前鋒舒拿達夫一記世紀金球逼和1:1。


柏歷 古里路保正選搏命


日前漢堡喺主場同目前蘇超一哥格拉斯哥流浪踢咗場熱身賽，教練芬克收起大部分正選，改派中場查洛林等後備上陣，考察佢哋表現，點知都踢得鬼死咁好，最後仲憑中場伊利斯域同前鋒孫弘民各建一功贏2:1，難得擔正嘅林志堅都踢咗78分鐘，而且表現活躍。




睇到班後備咁勁，球奇相信柏歷、荷西古里路等一班正選為保住自己地盤，今晚落到場都會加多兩錢肉緊，畢竟漢堡目前仲排下游，落後紐倫堡1分，呢場6分波絕對唔衰得。


紐倫堡輸往績作客腳軟


紐倫堡上輪主場贏凱沙羅頓1:0，但今晚作客出擊睇怕凶多吉少，事關佢哋今季德甲作客成績只係一般，7戰得2勝5負，入4球勁失14球，加上近6次作客漢堡又得2和4負劣績，當中4場仲食白果，今晚想打破宿命真係唔係咁易囉！


漢堡主場對賽醒


日期 戰果

10/09/11 漢堡 1:1 紐倫堡

10/05/01 漢堡 4:0 紐倫堡

07/09/22 漢堡 1:0 紐倫堡

06/12/09 漢堡 0:0 紐倫堡

05/08/06 漢堡 3:0 紐倫堡

04/08/28 漢堡 4:3 紐倫堡