異獸戰午夜場 狼隊噬黑貓

猪拉多纳

04/12/2011
文： 樂比堅尼

今晚英超上演「狼貓」大戰，狼隊主場對「黑貓」新特蘭。「黑貓」今季戰績低落，美國班主索特已忍唔住將領隊布魯士落鑊，雖然賽前奧尼爾落實接任，但今場只會入場觀戰，狼隊正好趁「黑貓」群龍無首乘虛而入，狼隊讓平半，樂比仔捧上盤。（有線201及301台周一凌晨零時直播）


狼隊同新特蘭季初表現都令人失望，未計算周六晚成績，狼隊排十七，新特蘭則排十六。老實講，兩隊都冇太大能力致對手於死地，如果要樂比仔揀，我會較信任狼隊嘅主場威力，畢竟佢哋對上兩次主場對新特蘭，都係喺落後嘅情況下反勝對手，可見呢隊波鬥志十足！

狼隊主場夠搏命

事實上，狼隊嘅最大優點就係拚勁同戰意，佢哋雖然技術粗糙，但絕不欺場，前線上史提芬費查、奇雲杜里同奧哈拉狀態都唔錯，近期入波唔成問題，最擔心嘅只係防線，不過新特蘭進攻能力非常有限，狼隊要力保不失唔難，所以除上盤外，細盤亦係唔錯嘅選擇。

新特蘭前鋒嘥氣

新特蘭先後失去兩位射手戴倫賓特及基恩，打擊可謂非常大，睇番佢哋嘅前線，真係冇一個可以擔大旗，淨係睇依家入波最多係右中場施巴斯坦拿臣，就知道黑貓前鋒幾咁不濟，被寄予厚望嘅「中堅賓」賓特拿，一向唔係高產量前鋒，加上費沙甘保及域咸受傷，池東沅又未夠班，夾硬要搵近年踢開左閘嘅基蘭李察臣打前鋒，一句講晒：「嘥氣！」