柏雷素爾晒冷大紅鑽

猪拉多纳

03/12/2011
文： 蘇豪

日職煞科日9場同時開賽，榜首三強分途作客衝冠，鬥志唔成疑問，能否贏晒益街坊，仍有所保留。「一哥」柏雷素爾作客浦和紅鑽，柏軍志在三分力求贏波捧盃，作客亦會狂攻，獨忌攻得太急後面失，捧大好過W！（now 633及有線148台周六下午2時30分直播）




柏雷素爾希望創造歷史成為日職史上首支升班首季即奪冠球隊，目前領先次席名古屋鯨魚一分，和波隨時失冠，全軍上下都會盡力爭勝，中前場球星李安度杜明基斯、佐治韋拿及田中順也等人季尾保持勇態，要撕破對手防線非難事。紅鑽領先尾三甲府風林三分，球差大幅拋離對手，護級機會高，放鬆心情隨時踢得更好。柏軍可勝不穩，但預期會有唔少士哥，捧大盤。


鯨魚勁箭射殺天鵝


另外，次席球隊名古屋鯨魚作客新潟天鵝，鯨魚季尾踢出強勢，澳洲中鋒約舒亞堅尼地着晒火，上場又建一功，聯賽士哥數字增至十九球，目前位處射手榜榜首，為助球隊蟬聯冠軍，肯定會繼續搏殺。




天鵝護級成功後散散哋，上場大敗於甲府風林腳下，後防甩漏多，大軍前仗曾於主場賽和飛腳，但今次戰意唔及鯨魚，實在難當攔路虎，可捧客勝！


飛腳鬥心跳旺大


另外，「三哥」大阪飛腳作客清水心跳，飛腳主力射手拉芬夏要坐波監，中場指揮官遠藤保仁或需負傷落場搏殺爭冠，大軍近三次對心跳全部開大，今場捧大較佳。（now 631周六下午2時30分直播）