歷基亞靠嚴寒天氣搶「芬」

猪拉多纳

30/11/2011
文： 自由恒

歐洲兩大盃賽嘅分組賽已經去到最後階段，唔少出線形勢都已經大定，喺歐聯戰線，已經篤定出線嘅都會力爭首名，避免喺淘汰賽遇上勁敵，不過喺歐霸盃，首名出線其實未必有着數。


燕豪芬要留力荷甲大戰


首先要認識吓歐霸盃32強淘汰賽嘅抽籤方法，12支小組冠軍及4隊成績最好嘅歐聯第3名將會列為種子，對手將會係12支小組亞軍，或者係4隊成績較次嘅歐聯第3名，換言之歐霸盃小組冠軍，一樣會撞到歐聯空降部隊，況且現階段唔少有機會次名出線嘅球隊，實力亦都非同小可，因此好多隊波鎖定出線資格之後，都未必派最強陣容應戰，並以作客球隊尤甚。


睇番歐霸盃C組形勢，歷基亞及燕豪芬都已經篤定出線，今晚兩隊相遇只係名次之爭，不過今晚要作客出戰嘅C組榜首燕豪芬，相信戰意會比較低，事關佢哋嚟緊會同飛燕諾上演荷甲大戰，今晚要喺攝氏-1度環境造訪主場7連勝嘅歷基亞，燕豪芬作客仲要讓波梗係捧1.7倍「讓球主勝」。（有線63及203周四凌晨4:05直播）