博熱刺3.4倍「讓球和」

猪拉多纳

30/11/2011
文： 力奇

一直視歐霸盃為次要目標嘅熱刺，今晚喺A組主場迎戰希臘球隊PAOK，雖然話主隊會派出大部分副選上陣，但佢哋主場已經6連勝，而且以柏夫里約真高為首嘅二線兵都要搏命爭上位，有力小勝攞晒3分，3.4倍「讓球和」值得捧場！（有線61及201周四凌晨4:05直播）


熱刺今季主攻英超，期望再次殺入4強，下季可以再戰歐聯掘金。班波暫時發揮理想，喺英超排第3，前景都幾樂觀，所以根本唔會分心落歐霸，諸如英超踢到曉飛嘅雲達華治根本未有註冊，射手艾迪巴約、中場柏加同隊長京治等，亦未曾上陣，取而代之擔正，則係喺英超冇乜上陣機會嘅俄羅斯射手柏夫里約真高、迪科爾、巴桑，然後再加上部分高質素新人。

首循環訪PAOK和0:0

不過大家千祈咪睇小熱刺呢班二線兵，佢哋至今小組4戰得2勝1和1負，累積7分排第3，只係落後榜首PAOK 1分，一旦今晚贏埋，出線形勢仲好好添！事實上，佢哋之前首循環出訪PAOK就僅和0:0，唔算曳㗎，今晚返到主場，贏番對手又有乜出奇？

熱刺主場勁6連勝

PAOK呢邊雖然喺歐霸表現唔曳，但喺希甲都只係排第5位，睇嚟要雙線發展有啲吃力。再者，佢哋今晚作客嘅白鹿徑，熱刺喺自己地頭已經6連勝，如果單計歐洲賽，熱刺近13場主場戰都只係輸過1次畀超晒班嘅皇家馬德里，試問PAOK又憑乜喺度發威呢？當然，佢哋之前喺分組賽4戰話晒都係未輸過，正所謂爛船都有三斤釘，力奇一於博佢哋力戰僅敗開「讓球和」啦！

橫數千軍

熱刺主場6連勝


‧主場6連勝，入15球僅失3球。

‧今為歷來第150場歐戰，之前149戰得84勝31和34負。

PAOK近6場歐戰作客不敗

‧近6場歐戰作客波得3勝3和。

‧主帥保路尼以往領軍作客英格蘭得1和2負。