活力紅魔反轉水晶宮

猪拉多纳

30/11/2011
文： 朱楓

啱啱喺英超失分嘅曼聯，今晚英聯盃8強主場對英冠球隊水晶宮，有權嚟個大反彈，事關紅魔領隊費格遜揚言今場將好似之前兩圈，大派年輕球員應戰，活力即時大增，適逢水晶宮呢排態沉兼鬧入球荒，1.52倍「讓球主勝」真係咪錯過！（now638台及廣東體育周四凌晨3:45直播）


曼聯近期表現一般，繼歐聯主場被賓菲加逼和後，日前喺英超對紐卡素又和波失分，不過領隊費格遜未驚過，揚言今晚响英聯盃8強，將好似之前兩圈咁，大派副選同年輕球員應戰。

曼聯預備組新星登場

睇番戰績，雖則曼聯之前兩圈都派副選應戰，但表現一啲都唔失禮，先後大勝列斯聯同艾迪索特3:0。即使當中入3球嘅奧雲今場肯定倦勤，但仲有貝碧托夫、馬捷達同馬美迪奧夫可供選擇；中場方面，復出後狀態一般嘅卡域克同近期成日打後備嘅朴智星，相信都會打番正選，有傳媒估計近期喺預備組光芒四射嘅法國中場新星保羅普巴好大機會擔正，加上後防好可能有達施華兄弟、基斯史摩寧鎮守，活力激增，仲要主場出擊，甩拖機會真係好微囉！

水晶宮冇態愈踢愈沉

水晶宮喺今屆聯賽盃連過四關先入到8強，不過朱楓發現佢哋4場都係喺主場贏對手晉級，似乎靠地利多過靠實力，今晚作客隨時大走樣。畢竟佢哋近期愈踢愈沉，日前喺英冠主場對下游球隊米禾爾都被悶和0:0，射手格連梅利仲喺場波12碼宴客，累球隊5戰不勝不特止，而且連續5場冇波入，信心可謂跌至谷底，作客奧脫福擺明聽炒格。

英聯盃及意盃賽制：

英聯盃為8強賽事，意盃為第4圈，若法定時間內打成平手，則需加時再戰，若加時仍未能分出高下，則互射12碼決勝負。

南球盃賽制：

採主客制兩回合淘汰賽，今輪為4強次回合，若兩回合總比數賽和，採作客入球優惠，若作客入球數字相同，則在次回合90分鐘後，立即射12碼分勝負。

橫數千軍

紅魔連派3蛋晉級

‧近3年兩奪聯賽盃冠軍。

‧對上兩圈均以3:0大勝對手晉級，非常輕鬆。

水晶宮5場不勝食白果

‧已5場不勝，全數食白果。

‧上4圈每場均入2球，對上一輪仲數修咸頓3蛋。