曼城超級後備夠爆廠

猪拉多纳

29/11/2011
文： 朱楓

阿仙奴今季喺英超出閘脫腳，老實講，奪標可能性已經微乎其微，爭盃仔先最實際，偏偏佢哋近期惡戰連場，領隊雲格都承認班球員攰到爆，今晚喺英聯盃8強主場硬撼派二線兵上陣都粒粒皆星嘅曼城，唔似會有運行，2.1倍客W值博！（now639台周三凌晨4:00直播）


廠仔派二線兵上陣


一向鍾意出o靚仔打英聯盃嘅阿仙奴，其實近年喺呢項盃賽成績唔錯，可惜上季入到決賽竟然不敵最後降班嘅伯明翰，令人大跌眼鏡。今季兵工廠喺英超成績唔係咁好，本來都諗住爭番呢隻英聯盃同球迷做吓交代。




只係人算不如天算，偏偏近期因為要兼顧歐聯，搞到班人殘晒，日前英超主場僅和富咸1:1，賽後領隊雲格都承認班球員身心俱疲，暗示今晚會大變陣，派戴亞比、查馬克等二線兵上陣，對住粒粒皆星嘅曼城，試問邊到夠砌？再講，阿仙奴近排成績回勇，其實都係多得尹佩斯，冇咗佢，兵工廠嘅實力，衰啲講句同英超中下游球隊冇乜分別。


曼城迪斯高孭飛搏殺


曼城今季有幾勁？相信唔使朱楓多介紹。之前兩圈對住伯明翰同狼隊，都輕鬆贏波晉級。由於今場始終係英聯盃，朱楓估計啱啱大戰完利物浦嘅曼城，今晚都好大機會派班後備上陣，但講緊班二線兵係阿當莊臣、迪斯高、高拉洛夫等國腳級人馬，玩吓手後備席仲可能有占士米拿、阿古路隨時候命，雖然「腦殘」巴洛迪利啱啱拎紅牌今場要停賽，但曼城人腳咁充裕，就算齋玩車輪戰，體力已經贏咗兵疲嘅阿仙奴成條街，要喺法定時間解決對手真係Easy Job。