巴塞受傷獅子大爆發

猪拉多纳

29/11/2011
文： 法比加輝

西甲周中獨腳戲，巴塞隆拿主場對華歷簡奴。「地上最強」上輪聯賽意外爆冷不敵基達菲，嘗到今季首場敗仗，聯賽榜亦因而落後死敵皇馬六分，衞冕現危機。不過受傷嘅獅子向來最可怕，巴塞常在失分之後下一仗大勝，因此加輝建議捧3.5球大。




（now 632周三凌晨4時直播）




巴塞上場作客以○比一不敵基達菲，原來已經係「地上最強」今季第五場失分嘅聯賽賽事，不過巴塞今季從未試過連續兩場聯賽失分，而且下一仗大多會踢得好好睇睇，例如狂數奧沙辛拿八比○，大炒馬德里體育會五比○及大勝薩拉戈薩四比○，都係失分後「發狂」嘅最佳例子。


華歷簡奴勁旅出氣袋


再者兩大中場法比加斯及恩尼斯達均傷愈復操，預計今場都可以落場比賽，增加巴塞嘅入波本錢。華歷簡奴則有後衞羅拔圖迪圖儲夠黃牌停賽，佢哋今季升班後表現尚可，但早前遇上另一班霸皇馬大敗二比六，始終實力與勁旅有分野，相信今場都難逃被蹂躪厄運。