神魔腦殘 挑戰最強紅牆

猪拉多纳

27/11/2011


自從晏菲路國王杜格利殊重新話事，紅軍喺英超對曼聯、車路士、阿仙奴甚至曼城都未輸過，最強紅牆幾乎針都插唔入，不過曼城擁有英格蘭球壇近48年最強火力，神魔混合體巴洛迪利足以毀滅整個足球世界，今晚利物浦喺英超主場硬撼曼城，面臨史上最大危機，最強防守對最強火力好睇過3D電影。




杜格利殊重掌紅軍後一日，領軍作客以0:1不敵曼聯喺足總盃出局，點知隨後7次面對同級勁旅拎到5勝2和驚人戰績（見附表），當中盧卡斯以56次嘅75%成功率，暫列今季英超攔截王，當選英格蘭西北部足球先生。而且，上季荷西安歷基只試過9次單對單被扭過，相反英超最佳左閘艾殊利高爾係38次！


杜Sir遇強戰績勁


另一方面，曼城「腦殘」巴洛迪利被視為半神半魔，原籍加納嘅父母係意大利移民，因家境問題兩歲被送去做人養子，大個後變超級問題青年，直至依家都唔肯認親生父母：「兩歲開始，每隔兩年就要簽延長寄養協議，過去咁多年我連生日都冇收過祝賀電話，到依家我出咗名，佢哋就想拉關係。」




巴洛迪利原本嘅加納姓氏係Barwuah，18歲正式獲得意大利國籍同身份證，據講咁多年嚟，佢只係半推半就試過一次請親生父母入場睇佢踢波，瘋狂魔性令佢斷絕親情，球場內外嘅惡行足以寫成地獄足球筆記，最得人驚係佢試過着住血唇印、步槍、刀仔圖案嘅暴力T恤周圍行，令人懷疑佢係天生殺人狂。


巴洛迪利10場入9球


但如果撇開腦殘嘅古怪行為，佢確有主宰勝負嘅能力，今季佢連盃賽踢10場入9球，帶挈曼城聯賽12戰入42球，打破近48年英格蘭頂級聯賽入球紀錄，同時跨季連續14場至少攻入2球，近53年得曼城做到，假如腦殘能夠將神力/魔力升級打爆利物浦，兩大紀錄就可以延續。