利記遇強愈強終極考驗

猪拉多纳

27/11/2011
文： Wendy

利迷早已接受愛隊經常陪跑，逼和史雲斯、新特蘭已習以為常，然而每當利物浦面對強隊如車仔、曼聯、阿仙奴時，利迷反而更有寄望，因知愛隊遇強愈強。




有利迷經常好自豪咁喺我面前講，「我哋雖然冇冠軍，但贏過×××咪夠囉！」若果今晚利記可以贏埋曼城，小妹就真係佩服得五體投地。今季暫時沒有英超球隊贏過曼城，要對強隊先發揮超水準嘅紅軍，今晚要替我們曼聯迷屠城！




經過上周中歐聯，曼城輸畀拿玻里後已失去出線主動權，領隊文仙尼該仗冇果斷換人換來各方狠批，相信今晚曼城上下一心都想搵利記出氣。今季曼城攻力驚人，十二場聯賽入四十二球，每場聯賽最少入兩粒，但紅軍門將連拿有料到，曼城隨時久攻不下。




紅軍今季令人失望嘅場次多的是，但一對強敵就打高幾班波，好似上周作客史丹福橋贏車仔。利記上季喺晏菲路送過三蛋畀曼城，近八年喺主場未輸過畀佢哋，往績有優勢，而且今季主場亦未輸過波，人腳上只欠缺謝老四，一於照撐紅軍。




熱愛舞蹈的Wendy，04年歐國盃Euro Babe變身成有線球彩台節目主持，當初對足球猶如混沌初開，依家已滾瓜爛熟，最愛暢談波經。




phone波熱線：1831 678

電郵：soccer64@cabletv.com.hk

「超級星期天」開放時間：晚上10:00-深夜2:30