紅軍劫富曼城

猪拉多纳

27/11/2011
文： 樂比堅尼

今晚英超大戰利物浦主場對曼城。紅軍上仗擊敗車路士後，已再次證明係大戰專家，今季對另外三支Big4曼聯、阿仙奴及車路士均贏盤，今仗有力再延續強勢。反觀曼城日前遭遇今季最大挫折，歐聯分組賽輸波陷出局邊緣，紅軍隨時踩多腳，順便阻止曼城拋離，平手盤捧紅軍。（有線200及300台周一凌晨零時直播）




其實利物浦呢幾年作風都冇乜變，都係遇強愈強、遇弱愈弱、讓波中伏、受讓贏盤，所以預測利物浦賽事，基本上唔使睇乜軍情、狀態，只要揸緊以上宗旨，都唔會點錯。何況利物浦今季唔使踢歐洲賽，可心無雜念應付聯賽，呢一點比起其他前列球隊係非常大嘅優勢！




曼城地獄餘生未回魂




曼城季初順風順水，畀人捧到上天，但樂比仔始終對呢隊波抱有戒心，畢竟領隊文仙尼經驗及能力唔及費格遜、杜格利殊、夏利列納及雲格等人，而且佢哋係一支由金錢推砌出嚟嘅球隊，球員士氣同戰意易動搖，當踢順境波時候自然冇問題，但一遇上逆境，好多問題就會接踵而來。




曼城上周中歐聯不敵拿玻里一比二，確實係頗大打擊，聖保羅球場堪稱「地獄球場」，曼城由地獄走番出嚟，隨時三魂唔見七魄，好難期望佢哋能夠突然回復水準。曼城上季作客晏菲路慘吞三蛋，今季即使再大敗，樂比仔亦唔會驚訝。