皇馬打吡戰狂性大發

猪拉多纳

26/11/2011
文： 法比加輝

周日凌晨爆發馬德里打吡戰，皇家馬德里主場對馬德里體育會。「銀河艦隊」強勢未止，周中歐聯大勝薩格勒布戴拿模後連贏十二場，不少主力還在周中避戰而得到充分休息，今場延續連勝應該唔難。皇馬最近火力十足，近三戰瘋狂轟入十六球，勒都勒唔住，大細中位數3.5球，加輝首選入球大。




（now 632周日凌晨3時直播）




皇馬近期表現確令人嘆為觀止，尤其係周中歐聯派上不少副選上陣，仍能大炒對手六比二，證明第二梯隊同樣「恐怖」，教練莫連奴點排陣都夠殺。不過「寸王」都冇因為球隊態勇而掉以輕心，佢賽前就話打吡戰一定難打，仲罕有地向對手笠高帽，讚馬體會今季強咗好多，有機會入前四攞歐聯資格，所以「艦隊」會嚴陣以待。




事實上莫帥為咗今場打吡戰，周中讓C朗、比比及卡斯拿斯等主力休息，希望佢哋能夠養精蓄銳應戰，而馬些路亦已傷愈復操，預計只有卡卡及艾比路亞兩名常規主力因傷缺陣。皇馬近期就好似揸住一把AK47落場比賽，瘋狂掃射對手，近三場合共轟入十六球，有兩次開「主其他」波膽，希古恩、賓施馬及C朗等個個弗到漏，實在好難拗頸捧細。




馬體會6連大




值得一提係馬體會近期亦屬大盤客至愛，皆因佢哋已經連開六口大，名副其實係攻強守弱嘅模範，斷估佢哋都唔會咁衰仔，今場突改球風玩死守。馬體會有法卡奧傷愈復出攻堅，鬥攻格好大機會演入球騷，3.5球大盤有1.72倍回報抵玩。