G組亂局辛尼特有計

猪拉多纳

23/11/2011
文： Wendy

歐聯分組賽咁多組裏面，G組無一隊係來自英、德、意、西四大聯賽，正宗亂戰之局。本來大家以為最曳嗰隊尼科西亞，偏偏依家踢完四輪以兩勝兩和排緊榜首，已經一隻腳踩咗入十六強！


嚟自塞浦路斯嘅尼科西亞雖然為上季聯賽冠軍，但今季成績有回落，依家只係排緊塞浦甲第三。佢哋曾經21次奪得本土聯賽冠軍，所以都係歐聯外圍賽常客，不過好少殺到入分組賽。

尼科西亞折箭頭痕

對上一次尼科西亞「意外地」殺入分組賽係2009/10球季，當時遇上馬德里體育會同車路士，以三和三負出局，今季企到喺榜首，當然同抽到靚籤唔使硬碰強隊有關。佢哋雖然質素有限，球星亦唔多，但依家出線形勢極有利。今晚作客對俄羅斯嘅辛尼特，只要和波就出到線，不過主要射手艾列頓艾美達有傷未必可以上陣，影響咗攻力。


辛尼特首循環作客領先一球在先，之後倒輸一比二，成場狂攻下都未能改變戰局，始終尼科西亞嗰場有啲睇頭。但今晚辛尼特返到主場就唔同講法，外國莊家初盤要主隊讓到一球、球半，好似贏硬咁！當然，論人腳同歐賽經驗，辛尼特唔會差得過對手，今晚最大隱憂係丹尼仔有傷未必可以上陣，但其餘人腳整體上仍然唔錯，好似舒洛哥夫今季喺歐聯腳風幾順。


辛尼特喺主場已贏過波圖同薩克達，無理由連尼科西亞都贏唔到，但對手有可能博和出線，有機會打守勢波。辛尼特未必贏好多，捧主W之外，大家可以博埋個「讓球和」。


（有線61及201台周四凌晨1時直播）