阿布慳錢 唔炒保亞斯

猪拉多纳

23/11/2011

車路士今季戰績唔掂，少帥保亞斯被指帥位不穩，不過英國傳媒大爆「車仔」炒保亞斯要賠2,000萬鎊（約2.5億港元），老細阿布入主後炒教頭使咗6,900萬鎊（約8.4億港元），為免增加球會財政壓力，未必會輕舉妄動。

炒教頭使咗8.4億

車路士由保亞斯接手後戰績滑落，保亞斯仍然非常淡定，皆因知道球會唔會立亂郁佢。據英國《太陽報》爆料，保亞斯現時周薪達15萬鎊，同球會份約仲有兩年半，阿布之前由波圖撬佢使咗1,300萬鎊，如果依家再請佢食無情雞，足足要賠多2,000萬鎊，加埋條數成3,300萬鎊，認真誇張！


阿布財雄勢大，不過自從佢○三年入主後，已經用咗6,900萬鎊炒領隊，刀下亡魂包括雲尼亞里、格蘭、莫連奴及史高拉利等，莫帥當年拎住1,800萬鎊離開史丹福橋，不知幾暢快。阿布咁唔忍得，保亞斯若果想拎筆巨額遣散費，不妨輸多幾場博炒。