李斯特城迎來蜜月期

猪拉多纳

20/11/2011
文： 麥馬拿仁

勉強冇幸福，冇咁大個頭戴咁大頂帽，對邊個都冇着數。李斯特城（圖）一朝得志，去年高調聘請艾歷臣當教頭，牌面睇頂呱呱，但好睇唔好食，最後失敗收場。現球會邀得前帥皮雅臣回巢，彼此夾慣夾熟，皮帥實而不華，可帶領「狐狸」再次衝擊升班席位。


皮雅臣回歸啱晒Key


彼此合作，最緊要門當戶對，好高騖遠夾硬搵來超班領隊，大家由day one開始已經唔夾，炸彈遲早會爆，艾歷臣呢段「狐狸情緣」一年就玩完，對彼此都係好事。皮雅臣於08至10年帶李斯特城帶得頭頭是道，可惜與老細文達歷唔啱牙，最後先被迫遠走侯城。今日文達歷已去，皮雅臣載譽重來；「狐狸」尋尋覓覓，終於搵到「真愛」，要好好珍惜。




皮雅臣執教英冠球會經驗豐富，絕對好使好用，而且又對「狐狸」運作極其熟悉，相信球隊短時間內會迎來蜜月期，今晚回歸第一擊主場鬥水晶宮，贏得。（周日晚11時開賽）