碧咸誓助銀河登基

猪拉多纳

20/11/2011
文： 樂比堅尼

明早上演美職總決賽，由洛杉磯銀河主場對侯斯頓戴拿模。今季係碧咸第五個美職球季，亦好可能係最後一季，咸哥於美職袋咗2億5千萬美元落袋，但一個總冠軍都未攞過，如果今次集所有利好因素於一身都贏唔到，恐怕亦難有下一次，所以一家大細同唔少荷里活巨星都力撐「萬人迷」圓夢！今日樂比仔同銀河搭同一條船，呃都係畀佢呃埋呢一次，就算輸都係值得！（now 633及660周一早上10時直播）


銀河班底堪稱Dream Team


樂比仔唔係先知，銀河贏唔贏到答唔到你，只能夠講今場好值得捧場。先講主場因素，銀河今季正式賽事主場未嘗一敗，更創下十三連勝，今場決賽一場過分勝負，預先「安排」喺銀河主場賀姆體育中心舉行，有心定無意，大家自行判斷。




人腳方面，銀河可以話係美職史上最強一隊，堪稱Dream Team，三大巨頭碧咸、當路雲及羅比堅尼喺水平唔高嘅美職完全超晒班，難得係球隊為免出意外，連班綠葉都係美職最頂尖嘅，好似入選美職最佳陣容嘅杜尼雲特同奧馬干沙利斯，巴西中場祖連奴都係好波之人。


「碧咸因素」拋窒戴拿模


另外係「碧咸因素」，碧咸係美職嘅傳奇，全靠碧咸美職先可以發揚光大，近年入座率勁升，打入美國體育主流，其貢獻早已寫入史冊，美國佬一向擅長包裝及製造煽情，如果碧咸如願捧盃嘅話，必定可創造更大嘅話題，即使碧咸今季約滿走人，美職都可以食住條水搵多啲！何況碧咸確係奇人，佢離開曼聯、皇馬前最後一季都攞聯賽冠軍，今次捧盃可謂順理成章。




侯斯頓戴拿模係一支唔錯嘅球隊，心理質素強，善於應付季後賽，故季尾九仗取得七勝二和佳績，可惜佢哋嘅頭號球星巴特戴維斯有傷，連個天都幫埋銀河，銀河贏波捧盃係眾望所歸，今場讓半一捧上盤！