悉尼缺箭和都收貨

猪拉多纳

12/11/2011
文： 立民

2011年絕對係球彩台男主持嘅好年，自己同幾個幕前戰友都有好消息。「阿聲」做完老竇，仲成功考到土木工程師牌，喜上加喜；而小弟同「阿Don」就喺差不多時間升級做爸爸。阿Don個囡囡啱啱出世，精靈可愛。




其實，陪你哋一齊睇波嘅球彩台主持，日常生活都唔單只足球，一樣要面對唔同嘅生活挑戰。當中梗有開心，亦都有唔順意時，高低起伏咪就好似一場波嘅過程咁囉！


澳職好少陪你食飯


對比兩位老竇戰友長期返夜工講波，我算好彩，只係喺晏晝出現主力做澳職，夜晚可以邊湊仔邊睇波。不過今晚就例外，因為講完頭場中岸水手主場對墨爾本勝利後，仲有場珀斯光輝主場火併FC悉尼，好少有喺食晚飯時間七點開波！所以阿囝，老竇要開工，陪唔到你食飯嘞！




（有線64及204台周六晚7時直播）




今季珀斯光輝同大部分人嘅人生一樣，有喜有悲，開季同布里斯班獅吼一樣唔識輸，但最近連續兩場作客比賽就露底！佢哋分別輸畀紐卡素噴射機同中岸水手，證明作客表現有待改善。好彩主場依家仲算可靠，保持住強勢，史美斯同美梅特就係關鍵人物。




對手FC悉尼近況不俗，上場反勝黃金海岸聯可以話係今季經典，不過今晚會唔見咗嗰場關鍵人物艾馬頓，佢雖然狀態已谷起，但因為要為澳洲踢世界盃外圍賽而缺陣，有啲可惜，咁進攻就要靠晒歷克卡利一個擔大旗喇！兩隊各有所長，實力打法亦相當接近，所以揀今場和波係個唔錯嘅選擇。

立民推介

珀斯光輝 Vs ＦＣ悉尼

珀斯光輝 和

立見澳職

立民在足球傳媒達十年，在香港中文大學畢業後加入有線體育台，曾參與過有線「2000歐洲國家盃」及「2002有線世界盃嘉年華」節目的資料搜集工作，也曾任職香港賽馬會足智彩市場拓展部。

2005年起，他進身幕前，曾任手機及網上足球頻道主持。2009年重歸有線，加入球彩台主持行列，主要參與「澳洲足球聯賽」、「英格蘭超級聯賽」、「歐洲聯賽冠軍盃」直播及「歐聯戰略館」等節目。