紅魔出副選夠炒乙組仔

猪拉多纳

25/10/2011
文： 自由恒

周日球壇充滿話題，AC米蘭連追4球反勝萊切，到曼市打吡爆出金句「Why Always Me？」，再到車仔慘遭球證玩死，球迷真係講幾日都講唔完，不過其中一個話題焦點曼聯就冇得抖，今晚又會再上征途，喺英格蘭聯賽盃16強作客乙組仔艾迪索特，1.47倍「讓球客勝」屬正路之選。（now638台周三凌晨2:45直播）




紅魔周日先至喺曼市打吡輸1:6，隔一日又要踢聯賽盃，睇落好似幾攞命，但查實喺剛戰有份落場嘅一隊主力，幾可肯定全部都會獲得休息，取而代之係4大射手奧雲、貝碧托夫、馬美迪奧夫同埋馬捷達，雖然論級數係低一截，但對住乙組仔艾迪索特仍然殺氣十足，其中「聯賽盃之王」奧雲上一圈作客列斯聯就梅開二度，火力完全唔使擔心。


艾迪索特晉級靠好籤


對手艾迪索特排乙組第15位都能夠殺入聯賽盃16強，皆因係抽到好籤，對上3圈最強對手都只係英冠嘅韋斯咸，其餘嘅卡素爾同羅奇代爾都只係甲組仔，去到16強已經係超額完成，就算對住唔係夫添嘅曼聯都惡唔出樣。