喜鵲孖B做東歎刺

猪拉多纳

16/10/2011
文： 樂比堅尼

今晚英超壓軸戰，紐卡素主場對熱刺。「喜鵲」紐卡素今季表現令人眼前一亮，已保持九戰不敗，前線「孖B」丹巴巴亞（BA）及貝斯（BEST）有亮麗演出，即使熱刺聯賽四連勝士氣如虹，但部分主力傷患纏身，樂比仔寧捧受讓平半嘅紐卡素。（有線200及300台周日晚11時直播）


紐卡素防線穩


紐卡素季初佳績令好多人跌眼鏡，能夠取得咁大進步，全因防線執正咗，今季擔正嘅荷蘭門將告魯爾堪稱新一代鋼門，年紀輕輕已非常淡定，聯賽已保持三場清白之身，而今季被委任為隊長嘅高洛仙尼，冇晒以往高章嘅陋習，而史提芬泰萊更踢出出道以來嘅佳作，外面好多呼聲要求卡比路選佢入國家隊。




此外，領隊柏杜羅致嘅幾名新人，都能夠對症下藥，特別係一班法語系球員如丹巴巴亞、卡比耶及奧巴坦迅速融入球隊，令球隊戰鬥力大幅提升，雙箭頭貝斯及丹巴巴亞今季合共射入七球，前面有波入，後防又唔失波，成績自然好。


熱刺傷疲交煎


熱刺係樂比仔心目中嘅四強隊伍，聯賽四連勝盡顯功架，可惜經過一輪衝鋒陷陣之後，樂比仔擔心佢哋狀態會出現調整，尤其係經過國際賽後，令球隊嘅傷兵數字增加，除原本嘅加拿斯、侯度史東及戴臣肯定缺陣，雲達華治、哥魯卡、艾朗連儂、艾迪巴約、卡蘭積卡及辛度雲尼亞里都有傷在身，最終邊個出得，邊個唔出得，樂比仔唔敢講，唯一肯定係呢班球員肯定唔喺最佳狀態。




熱刺多年來作客聖占士公園成績唔算突出，近五次聯賽未贏過，今場仲話要讓波，樂比仔撐下盤。