紅軍晏菲路驅「魔」

猪拉多纳

15/10/2011
文： 阿占

英格蘭出線歐國盃外圍賽後，今個禮拜英超即刻上演大戰！利物浦今季回復勁旅本色，令今晚佢哋喺主場迎戰曼聯呢場「雙紅會」更有睇頭！雖然曼聯近年成績遠勝利物浦，不過紅軍今仗有神奇隊長謝拉特回歸正選，咁啱紅魔近三季造訪晏菲路都輸波，難得「利記」今鋪仲有得受讓，梗係撐1.54倍「讓球主勝」啦！（有線200及300、廣東體育周六晚7:45直播）




利物浦自從搵杜格利殊揸旗後重拾班霸本色，蘇亞雷斯固然弗爆，就連上仗開齋嘅安祖卡路爾都回復勇態，有呢對一快一高嘅前線拍檔，使驚紅軍冇波入咩？最重要嘅係，之前一路養傷嘅謝拉特，今仗久休後復任正選，需知道「神奇隊長」一向係紅軍嘅攻守泉源，佢老人家難得喺「雙紅會」呢個大日子王者回歸，仲唔搏老命證明自己仲係利記大佬咩？咪忘記上仗紅軍喺默郡打吡完勝愛華頓，士氣正式係High到爆燈！


曼聯近3季作客輸晒


講真，利物浦近十幾年睇住死敵紅魔捧完一個冠軍又一個，真係有啲「葡萄味」。可能因為咁，紅軍近年喺主場對親曼聯都出盡120%努力，希望藉此安撫一眾Fans！睇番對上三季聯賽交手，紅軍喺晏菲路分別贏2:1、2:0同3:1，就係最好嘅證明！


朗尼醜聞多影響表現


相反，喺國際賽期間爆出嘅醜聞，幾乎單單都同曼聯有關，朗尼因為爸爸捲入假波案，搞到情緒出現問題，喺英格蘭對黑山一仗仲食埋紅牌做罪人，沉重嘅壓力，唔多唔少影響佢陣上表現。況且曼聯近期狀態回落，造訪史篤城同賓菲加都係執得1分，主場對住諾域治仲錯漏百出，最後贏波只係有運！今晚佢哋作客回勇嘅利物浦，想贏波真係唔易！


頂占筍盤：利物浦（讓球主勝）


有線球彩台主持阿占




電郵：soccer64@cabletv.com.hk&#8195HONE波熱線：1831678

「超級星期六」開放時間：周六晚9:00至周日凌晨2:30

橫數千軍

 紅軍近8戰6勝

‧近8戰6勝2負，有6場射入2球或以上。

‧近6次主場交手4勝2負，對上3次全勝。

 曼聯朗尼少開首球

‧近8戰5勝3和，有6次在半場已領先。

‧朗尼暫以9球排射手榜第一，但只取得1個首名入球。