巴塞狂鋒殺到華倫「大」禍臨頭

猪拉多纳

21/09/2011
文： 走肖

西甲今晚爆發重量級大戰，華倫西亞喺主場對巴塞隆拿，1.48倍入球大追得過。今季巴塞嘅攻擊力比以往更恐怖，歸隊嘅法比加斯同老友美斯組成「FM組合」，威力仲勁過原本嘅「MVP」，開季後兩個夾埋貢獻13個入球、11次助攻，有咩辦法唔開入球騷？（now632及660台周四凌晨4:00直播）


法比交靚波 美斯更加醒


雖然巴塞有新買嘅翼鋒阿歷斯山齊士養傷，中場恩尼斯達、麥士維同艾迪安奴未好番，後衞碧基傷愈尋日先至第一課跟操，但日前對奧沙辛拿照樣贏8:0，點解咁勁？因為法比加斯同美斯真係夾到絕，落到場好似連眼色都唔使打，就知道對方諗乜嘢，計埋對奧沙辛拿攻入1球兼交出助攻帽子戲法，法比加斯回歸後有4個入球4次助攻。




美斯當然更勁啦，開季後連盃賽有9個入球、7次助攻，比上季同期嘅6個入球、1次助攻表現更搶鏡，而且佢同法比加斯經常互相造就對方入波，睇直播嘅時候，有時簡直覺得自己睇緊《足球小將》入面嘅戴志偉同麥泰萊屈機咁樣。呢對黃金拍檔，數據上應該連昔日巴西夢幻組合羅馬里奧同白必圖都比唔上。


華倫蘇爾達杜趕及傷愈


巴塞解決咗法比加斯融入教練哥迪奧拿進攻體系嘅問題，華倫又點呢？佢哋聯賽3戰全勝暫列榜首，賣走中場桑馬達依然冇冧檔，證明教練艾美利真係有料到。仲有呀，連續3場聯賽入波，累積5球進帳嘅射手蘇爾達杜上場足踝受傷離場，好彩最新消息話佢可以趕及傷愈喺今場搏殺，唔玩入球大點得？


華倫交手3連敗


‧蘇爾達杜以5球與美斯並列射手榜No.1。




‧近3次對賽全敗。

巴塞近戰旺開大

‧今季7場賽事6次開入球大。

‧對上7場6次半場領先、1次打和。