美墨大晒冷

魑魅魍魉

25/06/2011
文： 巨高

美洲金盃明早上演決賽，兩支宿敵美國及墨西哥繼○七及○九年後，連續三屆會師決賽。兩軍實力接近，對上兩屆各贏一次，○七年美國贏二比一，○九年墨西哥就大勝五比○，數據有迹可尋，巨高追捧大盤。（now 634周日早上9時直播）




美國上屆決賽主場吞墨西哥五蛋，慘被宿敵蹂躪場面歷歷在目，今屆必定打醒十二分精神迎戰。論數據，美國於今屆金盃賽事極旺細盤，五場賽事僅得一仗開大，尤其是球隊次仗輸畀巴拿馬後作出變陣，防線變得固若金湯，近兩仗分別以二比○及一比○淘汰牙買加及巴拿馬，穩守風格令今場大盤賠率有2.29倍，對於兩支具入球能力球隊上演決賽嚟講，呢個絕對係超賠率，加上美國先前對手實力都較弱，防線根本未受考驗，今次對墨西哥先見真章，配合兩軍多年恩怨情仇，隨時繼上兩屆後再演入球騷。


墨西哥死砌美國


墨西哥三場分組賽狂省十四粒後，進入淘汰賽即時跌Watt，前仗僅以二比一反勝危地馬拉，上仗更被洪都拉斯悶和○比○，加時先入兩球晉級決賽，巨高認為佢哋死火係因為過熱，對手專注防守下又點可以場場大炒？但今次對美國係五五波，入波難度反而冇咁大，查維亞靴南迪斯、艾度迪尼基斯、杜斯山度士及古亞達度等前線殺手又有胡叫，不過巨高認為兩軍有邊個冇邊個都冇所謂，捧大盤最緊要係墨西哥對親美國都好肉緊，近五戰就有四次開大，主要係因為美國人一向睇小墨西哥人，在美墨西哥人成日被恰，所以國家隊喺球場上就要為同胞搵番尊嚴，還記得上屆決賽墨西哥領先後仍狂攻美國，心態上係入得幾多得幾多，所以大盤絕對抵玩。