巴拿馬Sharp醒蓄勢待薩

猪拉多纳

19/06/2011
文： 亨格比利

睇完美國對牙買加，聽朝仲有場巴拿馬鬥薩爾瓦多嘅金盃守尾門。巴拿馬喺今屆賽事表現Sharp醒，最後一場分組賽仲留晒力添，叉足電肯定有更好發揮，要贏見晒底嘅薩爾瓦多唔難吖，捧1.62倍主勝。（now634台及廣東體育周一早上6:00直播）


薩爾瓦多好打有限


巴拿馬陣中冇球星，但近屆被睇淡下都成功喺分組賽突圍，今屆亦好叻仔，先後喺小組砌低瓜德羅普同大熱門美國，以C組首名躋身8強，搞到班國民鬼死咁興奮，紛紛仆晒去巴拿馬國內嘅酒吧睇直播遙距打氣。據講，由於當地酒吧都逼到爆，唔少老闆怕有意外竟然要趕客，勁誇張！




呢支05年金盃亞軍喺最後場分組賽逼和加拿大，領隊祖利奧華迪斯寸到收起咗6位主力，預期門將賓尼度、中場艾美卡軒歷基斯同邦拿加幾位骨幹，都會喺聽朝復任正選。對家薩爾瓦多近兩屆賽事都喺分組賽止步，陣中後衞馬雲干沙利斯同烏曼蘇仲要冇班落添，加上喺A組分組賽又試過喪吞墨西哥5蛋，睇落好打有限，聽朝唔慌有運行。