英軍少爺兵咬唔入捷克

猪拉多纳

19/06/2011
文： 樂比堅尼

香港時間周一凌晨上演Ｕ21歐洲國家盃最後一輪Ｂ組分組賽，英格蘭Ｕ21對捷克Ｕ21，英格蘭兩戰僅得兩分，要出線嘅話今仗非勝不可，但「幼獅」踢來全無生氣，進攻板斧欠奉，今場未必咬得入捷克Ｕ21，樂比仔推介1.78倍「讓球客勝」及細盤。 （now 633周一凌晨２時45分直播）




賽事展開之前，英格蘭Ｕ21被視為奪標熱門，但踢咗兩場分組賽後，演出令人失望，好多名氣甚大嘅球員，演出同身價不相符，樂比仔唔知係佢哋經過漫長球季後，太攰倦而影響表現，定係已學識擺明星架子，踢波特別錫身。


史杜列治韋碧克冇火花


英格蘭Ｕ21現時問題主要來自進攻，韋舒亞同安祖卡路爾冇入選，令球隊欠缺重心，作為隊長嘅文切尼擔任防守中場，可以用進退失據嚟形容，呢位來季轉投漢堡嘅球員係有質素，但踢咗咁多年仲未搵到自己嘅最佳位置，連續兩場分組賽被領隊皮雅斯換走，證明皮雅斯對佢嘅表現亦唔多滿意。




不過最大問題係前鋒線，以往有安祖卡路爾呢位target man喺度，英格蘭進攻好有目標，但依家搵史杜列治同韋碧克打箭頭，兩人由於踢法太相似，加上係屬於需要供應嘅前鋒，搞到進攻好迂迴，如果樂比仔係皮雅斯，就寧願出大勇嘅史葛冼佳亞，配搭「坦克車」域文攻堅，簡簡單單咪好囉！




捷克近年青黃不接，不過呢班Ｕ21喺國內被寄予厚望，認為佢哋遲早會成為大國腳嘅接班人，初步睇質素係唔錯，好似柏赫特及杜卡爾都有機會成為明日之星，如果從頭兩場分組賽嘅演出推斷，英格蘭Ｕ21今場優勢真係唔大，一於捧「讓球客勝」，等捷克送英格蘭班少爺兵提早「畢業」！