艾夫斯堡3分手到拿萊

魑魅魍魉

18/06/2011
文： 湯美‧烏爾文

今晚瑞超重頭戲，由近期走勢凌厲嘅榜首球隊艾夫斯堡，作客傷兵滿營嘅加費萊，預料可憑超班實力贏波全取3分，1.82倍客勝咪走寶。（開賽時間：周六晚10:00）




艾夫斯堡上仗主場大炒米贊比4隻光蛋後，近7場比賽贏咗6場，夾埋仲攻入咗15球波之多，並以1分之微力壓次席嘅傳統勁旅希爾星堡居榜首，雖則佢哋踢多希堡一場，但勝在士氣高昂。事實上，艾夫斯堡能進佔榜首，同一班年輕小將好似中場希真麥克、洛特馬克及侯爾特等近年進步神速有莫大關係。


加費萊主場對賽不勝


反觀加費萊近2場聯賽死晒火入唔到波，今晚對住排榜首嘅艾夫斯堡肯定會踢得更加保守，最慘係中後場又有奧哈根、丹尼爾利奴同艾斯比3名主力齊齊養傷，形成攻不銳守不穩。




艾夫斯堡除咗實力同狀態較佳外，對賽往績亦佔優，加費萊自05年重返瑞超後，就未試過喺主場擊敗對手，僅得3和3負劣績，球員心理輸蝕，要搶分更有一定難度。




湯美為瑞典資深傳媒人，自1991年開始緊貼瑞典足球消息，他的報道及評論文章曾刊於www.svenskafans.com等足球網站。