墨西哥勢炒危地馬拉

魑魅魍魉

18/06/2011
文： 樂比堅尼

美洲金盃終於嚟到八強戰，大熱門墨西哥明早出戰危地馬拉。睇完分組賽表現，樂比仔相信如無意外墨西哥都會攞冠軍，即使今仗「讓球主客和」讓二球多咗啲，但一係唔玩，要玩一定捧墨西哥，因為呢一棵「無敵仙人掌」超晒班，真係多多都有得贏，捧1.9倍墨西哥「讓球主勝」！（now 634周日早上8時直播）


分組賽三戰狂省14粒


墨西哥喺三場分組賽合共入十四球，如果有睇直播嘅朋友，相信都會覺得少，因為佢哋每場平均射門超過二十次，有一半以上係命中目標，如果把握得好啲，又或者認真少少嘅話，真係場場都開到「主其他」！




墨西哥點解咁醒？樂比仔歸納出以下原因，首先係人和，雖然美國係今屆主辦國，但樂比仔不厭其煩講多次，入場睇波嘅起碼有八成係捧墨西哥，因為美國球迷主要係墨西哥移民，所以就算美國主場對墨西哥，佔「主場」之利嘅都係墨西哥。


為領隊打江山必搏盡


第二，呢隊墨西哥真係好醒，同八六、九八年世界盃嗰兩隊絕對有得比，「小豌豆」查維亞靴南迪斯固然大勇，杜斯山度士、巴里拉、古亞達度同迪尼基斯表現一樣好出色，佢哋依家踢緊嘅係「巴塞式」足球，即係佢哋要入你幾多就幾多！




最後係墨西哥領隊迪拿托利確實有料，呢位低調領隊名氣唔大，但無論調兵遣將、處理球員關係同提升士氣方面都做得相當出色，佢喺今年二月先接手，今次美洲金盃係佢帶隊首項大賽，故球隊上下都好想幫佢攞番個錦標。墨西哥已表明部分主力唔會出戰下月美洲國家盃，所以美洲金盃絕對係志在必得，今場一於捧「讓球主勝」！