有數得計：鳥棲弗爆o靚仔反轉北九州

猪拉多纳

12/06/2011
文： 九叔

愈嚟愈多過氣球星去日乙嘞，最新一個係前日本國腳鈴木隆行加盟水戶蜀葵，但係執啲過期貨係咪用途好大呢？九叔不嬲唔多信，反而就睇好鍾意培養新人嘅球隊，好似今日會作客北九州向日葵嘅鳥棲砂岩，呢期就非常值得睇好。（開賽時間：周日下午2:00）


北九州3連勝只贏弱隊


鈴木隆行雖然唔係乜嘢一線球星，不過都算係日本留洋名將之一，有個「師匠」、「金狼」嘅朵，今年4月22日佢响Twitter放過風話收山，點知後尾轉軚連段文都剷埋，前日終於宣布唔收錢幫水戶踢波，認真畀佢吹脹。曾經傳過可能嚟香港嘅鈴木，啱啱滿咗35歲，表現只會有落冇上，佢幫到水戶幾多好惡講。




相反今年煥發生機嘅鳥棲，就重視o靚仔多過重視名氣，呢幾年佢哋培養咗唔少新人，隊波好有朝氣，而且開始踏入收成期。例如個中場金民友，剛啱入選咗南韓U22奧運隊。早兩日鳥棲仲傳出會正式簽埋佐賀大學個21歲借將黑木晃平，呢個細路屬於J聯賽特別指定選手，係日本足總嘅重點培養對象之一。




鳥棲就係靠呢班o靚仔，家陣坐响日乙第三，呢班波今季對住後10名嘅球隊好少失手，兼且往績食住對家北九州。雖然北九州近3次主場全勝，但係贏嘅對手全部排名响14位打後，根本不足為據，鳥棲絕對有權開出1.65倍客W。