波場大亨：雙哥交鋒爭做大佬

猪拉多纳

12/06/2011
文： 亨格比利

環顧今屆美洲金盃，最黑仔嗰隊都算係墨西哥嘞！呢支衞冕冠軍前日爆出5位國腳藥檢肥佬要即時停賽，嚴重影響領隊迪拿托利嘅部署，不過佢哋勝在人腳超班兼篤定躋身8強，聽朝對住出線形勢大好嘅哥斯達黎加，照計雙方冇乜包袱實會踢得放，呢場A組分組賽一於要入球大。（now634台周一早上8:00直播）




墨西哥今屆賽事黑過墨斗，先有老大哥奧蘇里奧懷疑患前列腺病離隊，日前門將奧祖亞、後衞法蘭斯高洛迪古斯、杜亞拿斯、中場尼爾遜同貝姆達斯仲懷疑誤食含有瘦肉精食物，被勒令即時禁賽。據講墨西哥足總已經Send咗上述5位球員去洛杉磯再做藥檢以示清白，另外又向大會要求補選球員，不過暫時仲等緊回覆，現階段要以17人應戰。




雖然兵源少咗，但墨西哥嘅戰鬥力依然超班，上輪缺少5位國腳照炒古巴5蛋，成功躋身8強。効力曼聯嘅查維亞靴南迪斯已經喺今屆賽事轟入5球，當中有3球仲係古亞達度助攻添，呢對「孖寶」咁有火花，聽朝隨時又夾手夾腳撕破哥斯達黎加防線。


小豌豆火併拜仁雷斯


同組排次席嘅哥斯達黎加目前揸住4分，由於佢哋嘅得失球差比第3位、只得1分喺手嘅薩爾瓦多優勝，今仗就算輸都仲有機會出線，壓力唔大自然夠薑踢得進取，以反壓墨西哥搶首名出線為目標。




佢哋個領隊拿禾比曾率領墨西哥勇奪03年金盃，昔日又喺墨國搵食多年，今鋪倒戈肯定熟晒路。況且陣中王牌前鋒拜仁雷斯已經傷愈，今戰極有機會復任正選，要知道墨西哥一對守將馬基斯同沙斯度都一把年紀，哥斯達黎加絕對有本錢同墨西哥鬥攻，入波唔慌少。