|
|
11/06/2011
西班牙U21被視為奪標頂頭大熱，當然與其大國腳近年橫掃世界球壇嘅表現有關，奪呢組首名資格呼聲極高。雖然英格蘭U21是今屆冠軍次熱球隊，但有多員主力缺陣，加上烏克蘭U21亦曾在附加賽擊敗勁旅荷蘭U21嘅往績支持，相信烏克蘭U21有力做攔路虎，另外捷克亦非魚腩，有力左右大局。
分組賽程
開賽時間為香港時間
捷克 Vs 烏克蘭 6月13日凌晨零時
西班牙 Vs 英格蘭 6月13日凌晨2時45分
捷克 Vs 西班牙 6月16日凌晨零時
烏克蘭 Vs 英格蘭 6月16日凌晨2時45分
英格蘭 Vs 捷克 6月20日凌晨2時45分
烏克蘭 Vs 西班牙 6月20日凌晨2時45分
捷克U21 不敗雄師一路奇兵
由外圍賽至附加賽共10場未逢敗績，成績有目共睹，因此好多人都將捷克視為今屆賽事嘅一路奇兵。事實上，領隊杜華利尼今次點兵徵召多名大國腳入伍，可見對今次賽事非常重視。
球隊之中，值得留意嘅係新季將會轉投德甲紐倫堡嘅高大前鋒柏赫特，此子射術極佳，喺外圍賽轟入9球，係前線危險人物。此外喺拉素亦企穩正選嘅全能中場高薩克亦係捷克爭勝嘅重要棋子。捷克喺2000同02年連續兩屆都能殺入決賽，2000年奪亞軍，02年更上一層樓奪冠而回，今年強陣出擊，有望再次挑戰佳績。
主將：柏赫特（紐倫堡）高薩克（拉素）
參賽次數：第10次
上屆成績：外圍賽出局
最佳成績：冠軍（2002）
烏克蘭U21 神秘之師好難捉路
烏克蘭今屆以土炮軍團姿態出擊，外間對其整體實力與踢法均較難估計，過往雖然僅曾一次殺入決賽周，但當屆即能奪得亞軍，「神秘之師」絕非浪得虛名。
今次外圍賽烏軍能壓倒法國出線，實非善男信女，領隊伊高雲高得到國家隊領隊布洛堅全力支持，派出7名大國腳隨軍出征，更揚言以奪冠為目標，足見其信心。陣容方面，隊長史堤巴蘭高雖有傷在身，但有佢壓陣可穩定軍心，戰術發揮勢必更見完美。前鋒耶莫蘭高被視為舒夫真高接班人，披起基輔9號波衫，曾為A隊上陣8次入3球，有望喺今次賽事大爆發。
主將：史堤巴蘭高（薩克達）
耶莫蘭高（基輔戴拿模）
參賽次數：第2次
上屆成績：外圍賽出局
最佳成績：亞軍（2006）
英格蘭U21 未出夫添依然咁堅
星光熠熠嘅英格蘭U21嘅陣容本來可以更加強勁，可惜前鋒利物浦中鋒安祖卡路爾、曼城後衞米卡李察士都話有傷唔踢得，另外阿仙奴中場韋舒亞更加主動要求免役，無論星味和整體戰鬥力都稍稍跌Watt。
英格蘭U21喺今屆外圍賽，戰績其實及唔上首名出線嘅希臘，不過呢班波一嚟到大賽就特別生猛，雖然唔能夠以最強陣容出擊，但陣中仍擁有曼聯前鋒韋碧克、車路士箭頭史杜列治、愛華頓中場魯迪維爾同曼聯中堅基斯史摩寧等猛將壓陣，可謂攻守兼備，只要佢哋臨場踢出水準，仍然係爭標嘅實力分子。
主將：基斯史摩寧（曼聯） 韋碧克（曼聯）
參賽次數：第11次
上屆成績：亞軍
最佳成績：冠軍（1982,84）
西班牙U21 超豪陣容全力衝冠
不論國家隊抑或球會，西班牙近呢幾年喺國際球壇可謂橫掃千軍，而承接大國腳去年奪得世界盃冠軍嘅威勢，今屆西班牙U21排出超級豪華陣容，全力衝擊冠軍。
巴塞隆拿三寶保贊、堤亞高艾簡達拿同謝法倫，華倫西亞中場桑馬達、畢爾包硬漢查維馬天尼斯、馬體會門將迪基亞同西維爾翼鋒迪亞高卡普等悉數入選，單睇牌面已經殺晒。而西班牙U21喺外圍賽錄得6勝1和1負，只係作客輸過1場畀荷蘭，附加賽兩回合計更以5:1大破克羅地亞，咁嘅人腳同實力，即使攞亞軍球迷都未必收貨啦！
主將：保贊（巴塞隆拿） 桑馬達（華倫西亞）
參賽次數：第11次
上屆成績：分組賽出局
最佳成績：冠軍（1986,98）
推介
首名：西班牙
次名：英格蘭 |
|
金睛卡
发表于 2011-6-11 08:43
变色卡
显身卡