紅牛靠亨利博大霧

港陌

10/06/2011
文： 亨格比利

金盃踢到如火如荼，美職呢邊就成為重災區，大批球星都要離隊為國效命，搞到唔少球隊實力受損。呢期就以紐約紅牛最大鑊，足足有成5位猛將缺陣，聽朝主場對住新英倫革命唔係食硬，玩2.05倍入球大仲穩陣。（now633及660台周六早上8:30直播）




今屆美洲金盃有31位球員嚟自美職，當中紐約紅牛係最大受害者，計落就有後衞馬基斯、添列姆、中場丹李察士、迪羅沙里奧同前鋒阿古迪路要為國效命，件件都係主將，教練漢斯碧基唔頭痕就假咯！


革命豆腐防線靠唔住


紅牛聽朝開波前會頒個成就獎畀史譚拿，以表揚呢位悍將昔日為球會作出嘅貢獻，呢支東岸球隊踢埋今仗就會展開連續4場嘅作客之旅，漢斯碧基已經落咗「柯打」要全力搶分，戰意唔需要懷疑。王牌射手亨利同中場新星奧斯甸達盧斯將肩負攻擊重任，要撕破革命防線唔難，弊在紅牛近6場聯賽場場有失波，攻強守弱問題絕對令人擔心。




對家革命聯賽3連敗，早排喺美聯盃仲慘吞肯薩斯體育會5蛋添，豆腐防線隨時畀亨利蹂躪。革命唯一喜訊，就係好波之人沙尼約瑟拒絕代表格林納達出戰金盃，有佢喺中場穿針引線，照計可以為紅牛防線帶嚟一定威脅。雙方近5次交手未試過冇波入，當中仲有3次開入球大添，相信今仗入波唔慌少嘞！