英軍搶嗒瑞士糖

港陌

04/06/2011
文： 麥馬拿仁

歐國盃G組外圍賽，英格蘭主場撼瑞士。「三獅兵團」有朗尼停賽，謝拉特、迪科爾等因傷缺陣，但仲有戴倫賓特、柏加等孭飛，於溫布萊出戰依然夠殺。瑞士兩名主力前鋒阿歷山大費爾同馬高史達拿剛退役，前線青黃不接，捧英軍「讓球主勝」！（now 671周六晚11時45分直播）


副選孭飛必搏


自卡比路接手後，英軍於大賽外圍賽表現穩定，現時四戰三勝一和，因對賽成績一樣，暫以得失球差壓倒黑山高踞榜首，而今輪黑山主場鬥保加利亞，「三獅兵團」要續當一哥必以三分為目標。朗尼缺陣，對球隊攻力、組織力當然有影響，但瑞士實力一般，出戴倫賓特、艾舒利楊格、禾確特等已經夠照，而中場有「當紅炸子雞」柏加壓陣，可解決「雙特問題」。後防方面齊晒腳，瑞士難越雷池半步。「三獅兵團」近三次主場都未贏過，但其實當中兩場係熱身賽，仲有一場就係鬥防守力強橫嘅黑山，今晚反彈決心十足，唔計上述三仗，再對上七次於溫布萊出戰英軍贏晒，退步中嘅瑞士好難擋得住。


瑞士雙箭退役


德國名帥希斯菲特執教瑞士接近三年，但球隊冇乜代表作，實力只屬歐洲二線尾，今次外圍賽曾主場鬥英格蘭，當時就輸一比三。瑞士人才凋零，多年來一直倚靠阿歷山大費爾同馬高史達拿攻堅，但二人於上輪外圍賽對保加利亞後齊齊退役，令攻力弱上加弱。希帥賽前無奈話：「我哋前線冇人用，今場或會起用新仔美密迪同恩洛辛艾馬加拉。」預料佢哋其中一人會搭利華古遜前鋒戴迪約克攻堅，條鋒線卡士、經驗、實力俱不足，如此形勢點止輸一粒？