史雲斯強攻雷丁

猪拉多纳

30/05/2011
文： 走肖

對於雷丁同史雲斯球迷嚟講，英冠附加賽決賽重要性等同歐聯決賽，贏嗰隊估計有9,000萬鎊（約11.5億港元）收入落袋。雷丁今晚喺溫布萊球場對史雲斯，兩隊實力同近況差唔多，不過史雲斯有嚟自車路士學徒嘅「雙車」波連尼同史葛冼佳亞開路，火力夠強平手抵捧啲。（now638台周一晚10:00直播）




假如史雲斯成功升班，將會係佢哋28年來首次喺頂級聯賽競逐，3月以借用身份加盟史雲斯嘅車路士前鋒波連尼，英冠上陣11場入6球，佢以前曾經踢過歐聯同U19歐國盃，但就好坦白咁話，今次喺溫布萊踢決賽，感覺完全冇得比，所以嗌咗全家人同12個朋友專登由意大利到倫敦捧場，講明要入波威畀佢哋睇。


車仔學徒借將幫到手


據講波連尼已經被帕爾馬睇中，下季好可能轉踢意甲，當然啦，如果史雲斯升到上英超嘅話，唔排除佢會留隊博轉踢大會。除咗佢，史雲斯仲有喺車路士學徒出身嘅史葛冼佳亞做升班武器，今季佢攻入19球，帶挈史雲斯近5場有4勝1和，攻入13球，領隊班頓洛捷斯講明會搵埋杜比打正選，排出433強攻雷丁爭升班。




另一方面，雷丁兩回合計以3:0掃低卡迪夫城，固然唔易恰，弊在今季攻入9個聯賽入球嘅翼鋒占美基比，仲未好得番，冇咗佢幫手策動攻勢，射手沙恩朗肯定會畀對手睇得更緊，唔容易惡得出樣。更何況史雲斯有左閘尼爾泰萊繼續停賽，都有副隊長阿倫達迪頂佢個位，影響唔算太大，守得住就可以靠「雙車」入波食胡，平手撐1.96倍客勝。