雷丁史雲斯絕細對決

猪拉多纳

30/05/2011
文： 麥馬拿仁

英冠升班附加賽決賽，雷丁、史雲斯決戰溫布萊，投X首選細盤。雷丁球星較多、經驗較佳，但史雲斯領隊羅渣士教過雷丁，深知對手虛實，本季兩次對碰都贏一比○。雙方後防都密不透風，決賽場合又必定謹慎，細盤1.62倍咪嫌少。（now 638周一晚10時直播）




兩班波之中，拿仁較鍾意雷丁，前鋒沙恩朗、路爾亨特級數於英冠鶴立雞群，左閘夏迪重炮又勁，而且季尾踢得水銀瀉地，但今次鬥史雲斯好難過關。史雲斯四平八穩，擅於控球在腳，後防極為穩健，最關鍵係主帥羅渣士○九年曾教過雷丁。


史軍領隊睇透雷丁


如搵當時雷丁陣容同目前比較，變化實在唔大，換句話說羅帥熟知對手球員踢法、強弱，今仗可作針對性部署。事實上，本季史雲斯兩鬥雷丁都贏，反映史軍根本唔怕雷丁，今場平手盤史雲斯有高水，較值博。




但兩軍實力半斤八両，法定時間極可能打和，買平手盤極可能走盤，不如轉攻細盤。兩軍後防都好硬淨又穩陣，雷丁上圈附加賽對卡迪夫城兩回合都冇失波，近六場離開主場賽事有五場不失；史雲斯本季四十六場聯賽只失四十二球，數字僅比冠軍昆士柏流浪多，今場升班生死戰，雙方都唔會冒進，捧細啱數。今場決賽九十分鐘打和，須加時三十分鐘，如仍未分勝負就互射十二碼決勝。