紅魔忌自亂步伐

港陌

28/05/2011
文： 江忠德

無論牌面同實力，巴塞確係高過曼聯，但係踢歐聯決賽要計埋好多場內外因素，「天時、地利、人和」少一瓣隨時都會影響大局，紅魔喺溫布萊等同半個主場，只要戒急用忍唔自亂步伐，有望與巴塞鬥個勢均力敵。




今場波曼聯被睇低一線係好正常，不過爭盃最忌做大熱門，球員心理壓力一定較大，巴塞「作客」溫布萊破唔到曼聯密集防守隨時愈踢愈急。曼聯贏英超冠軍，費爵爺居功至偉，呢件「老薑」知道男子漢喺邊度跌低就要喺邊度企番起身嘅道理，佢叫球員睇番兩年前輸畀巴塞嘅片段，谷起嘅火隨時勁過火山爆發。




巴塞演繹出完美無瑕嘅足球藝術，一氣呵成表現出色嘅進攻同防守，球迷睇到心花怒放，要喺巴塞巔峰時期砌低佢哋，曼聯一定要有耐性切忌自亂步伐，雙方鬥智鬥力為球迷呈獻精彩感官享受。