伯明翰護級自作孽

猪拉多纳

22/05/2011
文： 江忠德

樹大招風！伯明翰捧咗聯賽盃之後成為眾矢之的，無論邊隊波對住佢哋都唔放軟手腳，更重要嘅當然係伯明翰自己唔爭氣愈踢愈曳，煞科戰撞正回勇嘅熱刺，輸埋呢場搞到要降落英冠有乜出奇！




英超護級形勢亂過亂世佳人，5隊爭3個護級名額，伯明翰由旁觀者變成玩埋一份，絕對係咎由自取，自從爆冷砌低兵工廠之後成隊散晒，佢哋喺冇受嚴重傷兵困擾嘅情況下，輸完一場又一場，最弊係前鋒冇力，依家只入得36球，係攻擊力最差球隊，麥利殊可能成為近25年來，第一個捧完聯賽盃即時降班嘅領隊。




今晚一戰對熱刺未來發展好重要，贏唔到隨時畀利物浦爬過頭搶埋英超第5位，連歐霸都冇份踢收入減少嘅話，老細肯定會勒緊褲頭，唔單止喺夏季轉會市場緊縮銀根，更糟糕嘅係有藉口賣走球星削減支出。熱刺作客利物浦強勢反彈，睇得出班球員唔想隊波喺下季變成陪跑分子，咬實牙根好頭好尾，伯明翰今晚作客冇運行。