羅馬戰將搏殺有森

猪拉多纳

22/05/2011
文： 巨高

意甲今晚煞科，頭三名及降班都塵埃落定，只剩番最後一個歐聯席位及歐霸盃入場券尚未有定案，其中要力保歐霸盃參賽權嘅羅馬主場對森多利亞。現任羅馬教練蒙迪拿好可能教埋今場就做番青年軍教頭，相信老友兼隊長托迪會帶頭做齣好戲，為蒙迪拿留下美好回憶，今場可捧「讓球主勝」。（周一凌晨2時45分開賽）




以現時積分榜形勢，羅馬只要與森多利亞打和就奪歐霸盃資格，但打死都唔信佢哋會喺煞科日死守求一分。事關今場係羅馬主場謝幕戰，球員都希望以勝利答謝球迷支持。加上森多利亞下半季衰到貼地，羅馬出八成功力都夠贏。


森多利亞球迷搞事停操


森多利亞近期有幾差就唔多講，最慘係球員欠正常操練。原來日前有大約五十名激進球迷，因不滿球隊成績而闖入操練場地，與球員及教練團隊衝突，據報雙方有發生過肢體碰撞，但警方未有拘捕任何人。因為衝突事件已經唔係第一次出現，為免情況惡化球隊決定取消所有操練，直接飛去羅馬比賽。森多利亞已篤定降班冇晒心機兼缺操，今場隨時慘敗。烏甸尼斯及拉素爭最後一張歐聯入場券，兩隊所踢賽事亦要留意。




國米炒得起卡坦尼亞




另外，較早時間舉行嘅國際米蘭主場對卡坦尼亞，同樣選擇「讓球主勝」。考慮到國米喺月尾要爭意大利盃，教練李安納度必下令球員全力爭勝，以谷起狀態迎接盃賽來臨。今場對手卡坦尼亞實力唔強，作客又例牌腳軟，國米喺煞科日有望大勝。