貝碧泰維斯叮噹靴頭

猪拉多纳

22/05/2011


英超神射手競爭激烈，曼城前鋒泰維斯現時與曼聯前鋒貝碧托夫同樣射入廿一球並列榜首，要踢埋最後一戰先分到高下。紅魔鬼前鋒貝碧托夫由一月尾至今只於聯賽射入兩球，主要因為季尾畀查維亞靴南迪斯搶走正選位置，不過領隊費格遜表明會於今場畀貝碧托夫落場搏殺，此子肯定會把握機會全力數胡。


泰維斯後上勢勁


至於泰維斯早前因傷休戰多時，近期復出展現極佳狀態，上場聯賽對史篤城梅開二度，兩個入球同屬靚波，反映此子信心甚強。不過，泰維斯一再表明有去意，主帥文仙尼亦話球隊下季冇佢都可爭標，似乎將帥關係唔多好。另外，阿仙奴前鋒尹佩斯及阿士東維拉箭頭戴倫賓特同樣有十七球在手，若能於煞科戰瘋狂取得士哥仍可後來居上。