三至六名仲有得爭串Ｗ

猪拉多纳

22/05/2011
文： 黃興桂

英超今晚煞科，曼聯已提早封王、韋斯咸則篤定降班，Peter認為兩軍今季成敗完全取決於兩名領隊。費格遜帶領紅魔鬼超過廿年，今季係我所見，佢喺部署買人、玩心理戰、調兵遣將各方面表現最精警一季，其個人能力早已毋庸置疑，相信無論佢執教車路士、阿仙奴抑或曼城，都有本事能夠捧走聯賽錦標，冠軍教頭實在當之無愧。


韋斯咸錯信格蘭


相比之下，韋斯咸起用格蘭肯定係今季最大敗筆，佢喺車仔時期從未協助球隊贏過任何錦標，之前帶領樸茨茅夫亦降班收場，睇佢平時帶波垂頭喪氣、面如死灰，彷彿天生已經注定係一個失敗者。韋斯咸在冬季轉會市場買入不少新球員，踏入下半季亦曾有一段短暫回勇期，可惜高層目光短淺，未有即時壯士斷臂，繼續向格蘭投以信任一票，間接將球隊推向萬劫不復之地。西布朗當時狀態、排名其實同韋斯咸差唔多，不過前者懂得搵鶴臣代替迪馬堤奧，成為球隊下半季反彈最大關鍵，如果「錘仔」高層能有如此遠見，球隊便不會落得如斯下場。




講番今晚賽事，焦點落在護級球隊，個人認為伯明翰形勢最危殆，事關對手熱刺仍要爭逐一張歐霸盃入場券，而且熱刺在主場球迷面前亦唔會放軟手腳，伯明翰搶分有難度。其餘韋根、黑池同樣遇上風流波對手，至少坐一分望三分，前景較樂觀。此外，聯賽三至六名球隊各有所需，曼城、阿仙奴爭直入歐聯分組賽，熱刺、利物浦則要爭歐霸，四支勁旅有戰意又有賠率，四串一贏波過關何樂而不為！