波圖專恰布拉加

魑魅魍魉

18/05/2011
文： 巨高

今晚歐霸盃決賽上演葡超內訌，波圖及布拉加在愛爾蘭都柏林球場決一死戰。波圖今季喺葡超以無敵姿態奪標，聯賽兩戰布拉加亦贏波，巨高對波圖奪標充滿信心，相信戰況會一面倒，捧波圖2.2倍「讓球主勝」。




（有線61及201台周四凌晨２時45分直播）


對賽往績贏晒


從對賽往績睇，波圖可謂佔得一面倒優勢，雙方近三次對賽布拉加輸晒，其中兩場波圖更以兩球或以上差距勝出。另外兩隊歷史上曾一百三十一次對賽，波圖取得九十二場勝仗，勝出率超過七成。若單計決賽的話，雙方曾經喺七七年及九八年葡萄牙盃決賽中碰頭，結果兩場都係波圖贏。有咁強烈賽績支持波圖，絕對有望繼02/03球季後，再次贏得三冠王美譽，當屆佢哋於足協盃（歐霸盃前身）決賽擊敗些路迪完成使命。




兼且今季波圖可謂歷來最強，於少帥保亞斯麾下，波圖以超強進攻加穩健防守橫掃葡超，最終以廿七勝三和得八十四分早早奪冠，入球七十三個，失球十六個，若非季尾開始hea踢，這個不敗金身數據一定更加完美。該隊今季兩次作客宿敵賓菲加都贏波，可見只要波圖想贏，於葡超已難尋敵手，更何況今仗對手布拉加？


布拉加掹車邊


布拉加係近年進步最神速的歐洲異軍，上季憑超強主場威力取得歐聯參賽資格，今季於歐聯外圍賽先後淘汰些路迪及西維爾，可惜於分組賽即見真章，對住阿仙奴及薩克達等實力分子即時唔夠踢，作客阿仙奴更慘吞六蛋。該隊轉戰歐霸盃後改打穩守突擊效果不俗，接連淘汰利物浦、基輔戴拿模及賓菲加闖入決賽，但全都掹掹緊過關，對比波圖大勝莫斯科斯巴達及維拉利爾的摧枯拉朽，布拉加絕對冇得比，加上大家熟晒路，布軍要爆冷真係好難，巨高認為佢哋九十分鐘守唔住，捧波圖「讓球主勝」。




今場若九十分鐘打和，將加時三十分鐘，再和則互射十二碼決勝。