雷丁碌卡冇手軟

港陌

17/05/2011
文： 麥馬拿仁

英冠升班附加賽四強次回合，卡迪夫城主場鬥雷丁。首回合雙方互交白卷，卡城靈魂比拿美受傷離場，今戰未必出得；另一張王牌保夫萊特亦谷唔起。雷丁狀態優於對手，近四次對賽未輸過，近十一次作客亦僅輸一仗，受讓平半要下盤！（now 638周三凌晨2時45分直播）




首回合卡城造訪雷丁，雷丁攻足全場並有多次威脅埋門，可惜全部未能化為入球，最後戰平○比○。但幾名主力沙恩朗、路爾亨特、麥安拿夫都狀態十足，整體表現非常出色，成場壓住卡城嚟打，入唔到波只係欠運。雷丁本季作客演出一流，除季尾贏過諾定咸森林、葉士域治外，二月造訪卡迪夫城亦兩度領先，最後打成二比二平手。




卡城跌Watt讓唔起雷丁




值得留意嘅係，雷丁本季踢足總盃好出色，去到八強作客曼城都係僅輸○比一，晉級過程中曾淘汰西布朗，去到葛迪遜公園球場亦贏過愛華頓，難怪領隊麥達莫治信心十足，話球隊作客都未驚過。今場雷丁仲有翼鋒占美基比可以復出，贏埋唔奇。




卡迪夫城季尾氣勢一般，近五仗僅贏一場，對手係降班魚腩普雷斯頓，而近三場更只入得一球。球隊現階段跌Watt好大鑊，保夫萊特近八場僅入兩球，只係靠中場韋定咸於中場苦苦支撐。季尾卡城主場鬥米杜士堡，半場已經落後○比三，反映球隊並非想像般強，今仗讓唔起大勇雷丁。