巴塞捧盃P演進攻科騷

猪拉多纳

15/05/2011
文： 走肖

西甲冠軍之爭已經結束，今場係巴塞達成聯賽3連霸後首次出戰兼領取獎盃，當然唔想令球迷失望，應該會整場入球「大」騷畀各位歎，特別係巴塞近兩季未試過連續兩場聯賽失威，失分後例必贏波反彈，今晚主場對拉科魯尼亞，唔憂冇波入，熱捧1.52倍入球大。（now632及660台周一凌晨3:00直播）




日前巴塞作客以1:1打和利雲特攞冠軍，捧場客應該唔收貨，不過咁，唔計對利雲特W唔出，近兩季巴塞喺聯賽13次失分，跟手嗰場聯賽全部贏晒，當中有8次坐底贏兩粒，10次同對手駁火開入球大，即係話，聯賽失分後有77%開入球大，唔捧點得？


拉科紙紮後防唔掂


再講，巴塞球王美斯依家喺射手榜落後C朗5球，即使要爬頭唔容易，相信佢都唔會認命投降，淨係睇教練哥迪奧拿畀佢對利雲特踢足全場，就知佢幾恨做神射手啦。




對家方面，拉科護級形勢都幾危急，心態上當然唔會任人魚肉，但實際上可能冇得還手呢！最近6季，拉科作客魯營球場全敗之餘，仲要全部開入球大，如果呢個時候，睇巴塞會送分畀佢哋護級，魯營球迷可能唔肯放過啲球員喎，而且拉科個紙紮後防，近14場聯賽作客得兩次保持清白，簡直一篤就散，益晒巴塞開入球派對慶祝捧盃啦。