廠仔將士用命保三哥位

猪拉多纳

15/05/2011
文： 牛奶仔

英超嚟到尾二輪賽事，阿仙奴今晚會喺主場迎戰阿士東維拉，兵工廠為保住個「三哥」位置，遇上戰意成疑嘅維拉格殺勿論，一於捧1.88倍「讓球主勝」。（有線202及302周日晚11:00直播）


維拉上岸踢風流波


阿仙奴上周作客輸畀史篤城後，正式宣布緣盡今季英超冠軍，但依家佢哋只領先曼城2分，因此仍要努力保住「三哥」位置以取得來屆歐聯分組賽資格。雖然兵工廠近3場比賽輸咗2場，不過佢哋主場出擊始終有一定保證，聯賽已經錄得11戰主場不敗走勢，當中取得7勝4和佳績。阿仙奴今仗續有法比加斯、拿斯尼同基捷基治養傷，但頂替佢哋嘅二線兵近幾場都表現理想，值得投下信心一票。




另邊廂，維拉上場逼和韋根後，幾可肯定成功護級，今場隨時會揸流攤。加上佢哋近4次同阿仙奴交手都未贏過，今仗仲要有中場大將桑馬干因傷缺陣，作客阿聯酋航空球場要全身而退睇怕唔係咁易喎！