韋根韋斯咸大限難逃？

猪拉多纳

15/05/2011


英超爭標形勢大定，但護級就仲有變數，今晚兩場護級大戰韋根對韋斯咸及伯明翰對富咸，對成個護級形勢相當關鍵。包尾嘅韋斯咸同尾二嘅韋根，兩隊別無選擇，今晚一定要贏波，孤注一擲捧大盤最佳；而伯明翰生死戰主場對踢風流波嘅富咸，就不妨信多「阿伯」一次。




先講韋根主場對韋斯咸（有線204及304台周日晚11時直播），韋斯咸喺二、三月嘅時候，曾一度有啲起色，可惜後勁不繼，近七場聯賽未贏過，經過昨晚嘅比賽，佢哋即使餘下兩場聯賽贏晒，護級機會仍然相當渺茫，今場只係盡人事，反觀韋根贏波尚有一線生機。




其實韋斯咸前線入球能力並非不足，可惜後防真係太曳，厄遜傷埋更令防線冇晒重心，近六場聯賽失咗十五球咁多，即使韋根攻力唔算強，但兩隊焗攻之下，防線一定多漏洞，故今場最佳選擇係大盤。


伯明翰鬥心勝富咸


至於伯明翰主場對富咸（有線203台及303台周日晚11時直播），形勢就簡單得多，伯明翰要搶分護級，富咸則可踢風流波，咁嘅情況下梗係捧主隊。伯明翰話晒係應屆聯賽盃冠軍，下屆仲要踢歐霸盃，如果降班嘅話就真係不堪設想，雖然兩名主力格力加特拿及列治維停賽，但阿伯勝在拚勁好，鬥志搭夠，主場小讓平半值得捧場。




富咸上岸後，上仗主場對利物浦失五球，好明顯就係球員放鬆晒，今仗作客如狼似虎嘅伯明翰，更加唔使望佢會搏，係都留番煞科戰主場「打大佬」阿仙奴好過啦！