洪禮賢講馬：輕輕鬆鬆賺晒

港陌

重心場次：第8場 第三班（80-60分）1000米

　　「輕輕鬆鬆」早課進一步內斂，以前過於搶鏡嘅舉動冇乜，然而早前落草地嗰課又唔係冇速度，一路帶返嚟，換句話說，目前又定又勁；排1檔可完全掌握到形勢，沿途守包廂位應該賺晒，贏面幾高。

　　「團隊精神」試大閘走得好，衰在過去4季初出例叮，有賠率就拖一注。「賞蝦王」1000米係短多少，但卻有唔錯狀態，又係冷腳。「威威財星」 10檔唔怕，因速度可靠兼輕磅，唯一怕係內側有幾匹快馬，唔知會唔會從中作梗。「洪福齊來」外地跑開中距離，但如果睇番上周日賽事，短直路及縮程未必唔好。

　　「哈哈妙」從來冇緣份，不過今晚呢個馬房布下重兵，揀唔揀，可參考之前場次廐侶的整體成績。

第1場 第四班（60-40分） 1000米

　　「盈驥」兩季初出有Ｑ，特利休後戰，所以唔太介意係馬房次選及延遲報名。當然，7檔起步未必cut到埋欄，但本身速度比同級優勝，如能克服，有權帶到。「興緻高」算係呢個馬房復課較早而又做得嘢，唔會嘆慢板。

　　「家橋」此程唔會比1200米失色。「領航動力」上季賽績係準，問題係隔了一個暑期之後，工序真係好hea。

第2場 第五班（40-15） 1200米

　　「齊鼓掌」上季尾一役已經博定先，整體表現比預期還要好，而唞暑後情緒方面更專注，如非此廐每每於季初慢熱，應贏。「大勇」計分賺到笑，有埋1檔好跑，而重戴眼罩或起到刺激作用（多年前初戴即勝）。

　　「金巴利來」試泥閘在尾段嘅勢頭普通，唯一變身嘅原因則係降班。「穩操勝算」做到足先跑，但久不久會閘慢之馬（試閘冇慢），兼且後上型或處下風，拖腳尚可。「齊齊掂」熱完身點都跑高多少。

第3場 第二班（100-80分） 1200米

　　「威利多多」排內檔對佢嚟講好重要（上季谷草上名俱排3檔或以內），加上回降此班，對手再唔係上季尾嗰批，相對增強競爭力。「開心動力」太過準，唔揀係違反數據。

　　「精彩生輝」心律不正復出，但見試閘好，又操得夠，隔夜十倍，幾抵博。「虎虎生輝」態況八九分水準，未必贏到。「六六精英」孱仔唞完暑係好事，班次或蝕點，以態搭夠，有權爆。「風雲勇子」冇咗上乎過「行」的姿勢係好現象，要留意走勢。「特好」兩季初出贏晒，正路腳。

第4場 第五班（40-15分） 1650米

　　「大唐勇將」比上季初贏馬時，跑低一個班次，計落好着數，而在嘉年華閘，試起上嚟好有角逐意欲，就算初出向來成績普通，都會博咗先。「龍子」眼見與前駒同試之時，末段係唔夠韌，不過，呢場冇馬走，可以益咗佢。

　　「喜相逢」具有基本狀態，只擔心未開氣而已。「中華寶寶」仍未改善到唔規矩的跑姿，但落班大過天。「康樂名駒」轉倉後演出準係賣點。「好友緣」準備唔係疏疏落落，降班其實好惡。

第5場 第四班（60-40分） 1200米

　　「質超駒」四班此程值班霸級，降班帶來的優勢可知，除非完全冇得追，或10檔的處境衰到痺，如果唔係，唔難入圍。「心歡笑」草地能力冇乜證明過，但季前操練既積極，佢又照單全收，點都要跟番場。

　　「日月暉華」嘉年華閘去到尾後一收就停，印象唔係咁好。「亞洲橙王」一路都話佢在此班1200米係高手。「百利旺」試埋大閘至跑，唔見得會冇胃口。「開心好多」仍未改到過於急口的毛病，就算放得出也不易帶到。「聖河」驚狀態較遲入局。

第6場 第三班（80-60分） 1650米

　　「福喜」之前兩季都冇今季準備得咁妥善，腳患得到控制的反映，投放大量工夫，進度上嚟得不錯，今賽路程又啱，有機會突破初出例冇三甲嘅盲門數據。「鵬力洋洋」應是今場狀況最靚之馬，檔好一哩又好，必揀。

　　「天下兵器」1檔如有「松風」和「銀太陽」沿途帶住，可能會賺晒形勢。「帝豪名駒」130磅未必讓得起。「驚喜」跌磅係隱憂，之但係，多馬走會啱追。

第7場 第四班（60-40分） 1650米

　　「創新高」休出好，谷草一哩有晒根據，如非重磅拖累，要佔一席唔係難事。「心頭好」及「超力駒」狀態幾好，除非今場完全冇步速，只要有得追，隨時起到作用。

　　「天下寶」可能首戰威力特強，唞夠復出會是黃金機會。「再來旺財」前領馬如果冇對手鬥放，隨時食正形勢。「回鄉精神」做得夠未必要熱身，唔係10檔，根本贏面最高。「愛睦善」9檔已先天不足，谷草向來亦唔好。