賠率有路捉：吉利多熱得離奇

博彩老头

　　今日開鑼戰第九場三班1400米，噚日早飛大熱門居然係摩廐「吉利多」，35蚊W、15蚊P，呢隻馬失準成性，上季尾最後一役被捧成40蚊大熱門，結果跑尾三，論馬邊有可能熱得過「旅遊大亨」、「愛蓮說」及「新意思」三匹四班穩打穩紮馬，唯一解釋係有人信心十足，隔晚落定墊底飛。

　　既然隻馬上季初出喺同程僅敗於「納帕二號」及「雙龍出海」半馬位得第三，該兩駒去季及後分別贏三班及四班賽，證明水準有保證；而大摩一向係季初急先鋒，今日精兵制只派四駒，睇飛呢隻最似樣，話唔定就係佢今季開齋馬哩

中國心P熱透

　　賠率古怪仲有第八場「中國心」，同場有「讚賞」及「錢照贏」在陣，邊有人估到佢位置居然係大熱，熱到得12蚊P，就算W都只係53蚊，真係唔講得笑，似乎好有把握呢隻馬坐位望贏。

　　留意呢隻馬近三次配梁家偉都跑第二，今日人馬繼續合作，應該有計，信得過。

騎師王捧蔡明紹

　　騎師王方面，韋達、柏寶都熱唔透，而賠率同蔡明紹不相伯仲，呢個情況好少出現，睇番蔡明紹只得三十六蚊，明顯開盤手對佢嘅坐騎好有信心，各位不妨睇高啲「神州八號」、「萬事佳」、「讚賞」、「旅遊大亨」及「同歡笑」嘅機會。

周仲