洪禮賢講馬 YIN''''S TALK：喺馬場千祈唔好「型」

猪拉多纳

　　有人讚你有型， 有時就要小心嘞！可能跟尾會有一句：「型就型，不過排第二..... 異形！」

　　型唔型，有時係一線之差，即係敗犬與老婆，兩者可能同是美人胚子，但前者最終冇人要，後者就有個身分，最終差別好大。

　　講番個「型」字， 要「型」經常要付出好大代價！像日前有單舉世矚目的新聞，話說有位空少，因與乘客有拗撬，之後先喺機倉開咪鬧爆，跟住整罐啤酒，邊飲邊打開飛機嘅緊急滑梯，落到地面後，越過晒禁區，就咁自行驅車返屋企。

　　暫時未知事情會如何發展落去？故事嘅前因後果係點樣發生，曲折離奇嘅報道與實況有冇出入？但有一點已可肯定，網上真係有唔少人讚佢型（不代表個人立場呀！），有外國網站誇獎佢係英雄，有網民話佢實現咗好多人嘅夢想等等，總之撐佢嘅大有人在。

場內保安嚴密

　　吖， 咁喺馬場型唔型得起？奉勸大家千祈唔好亂嚟！因場內保安森嚴，覆蓋範圍夠全面，五步一個保安，十步一個警官，有乜異樣，好快有人撲埋嚟平息一切。

　　而入場多年所見，其實此地的馬友都好克制，唔覺有咩好「型」嘅舉動出現，至少唔似得外地一些體育活動咁，例如每年盛事欖球賽咁，無端端會有人一絲不掛衝出嚟，繞場幾周，或鎖住自己喺龍門口。我輩馬友在沙圈最型嘅舉止，多年以來都冇變過，咪就係對住啲騎師開汽水，同埋不停「噓噓噓！」相比之下，真係斯文得多啦。

洪禮賢　馬會賽馬節目主持