洪禮賢講馬YIN''''S TALK ：堅持信念探求事實

港陌

　　堅持信念之所以重要，除了因對自己負責之外，某程度上也是探求事實，當初的假定與最終結果是否相符，係咪偏離原來軌迹， 甚至乎大錯特錯，如果唔堅持，未到中途已離場， 那麼孰對孰錯，永遠是個謎。至於像我輩評馬人，提供貼士係指定動作，但若然自己都信唔過自己，提供嘅貼士唔係自己下注嗰堆冧巴，工作的信念何在？！

　　筆者一年總有幾次與親戚聚會，唔知係我仲有得高，定係佢哋善忘，除了會問：「咦，禮賢，又高咗喎！」另一個問題就係：「究竟你畀貼士嘅馬，同買嗰啲馬係咪一樣，唔好收埋嚟食噃，講兩隻嚟發個新年財啦？！」而我通常都會笑笑口咁答：「女都生埋，乜原來我仲有得高咩？同埋，邊有咁多好嘢收埋，向來投注都係跟自己大貼士照買。」

　　講開堅持己見，季尾日馬煞科做Live，其中一場貼咗「上浦駿將」，雖然最後只得殿軍，不過也有滿足感， 源自對此駒的信念，只因陣上見過佢用錯跑法或走規唔好都有走勢，就算煞科戰前曾連敗，但那兩場俱跑變化地，大可作借口再畀機會。

　　而「上浦駿將」跑第四嗰場，如果唔係外閃可能有Ｐ，但另一方面終於顯示到唔係零價值；展望牠經今季大幅減分後，下季應可翻一番，兩Ｗ係保守估計。又譬如谷草煞科戰，一直認為「創新高」之前贏馬水準高，唔應該冇得再W，其後敗仗也有借口原諒，最後假定與最終結果相符。

洪禮賢　馬會賽馬節目主持